هديت طيري على حبارى ولا جاها وهو العام صايد

السلام عليكم ورحمة الله وبركاته

جاني أتصال قبل يومين من واحد من أخويانا يسألني وأنا جاوبته وحبيت أطرح الموضوع لأخواني في مكشات للاستفاده

خويي اتصل وقالي طيري هديته على الحبارى وماصادها ولاجاها طبعن العام طيره صايد ولاكن هناك مشكله

ياأخواني أغلب الطيور عقب ماتطلعه من الربطه وتدهل الطير وتدعيه تحس الطير بارد وخصوصا ماهو مثل قبل تربطه لانه كان مستهد للهدد والصيد فالواجب على الصقار لاطلع طيره ودهله ودعاه لمدة 20 يوم الى 30 يوم يبداء يخلي الطير (يستهد ) يعني خل طيرك يجيه (شفاح ) على الصيده

كيف يستهد :

عقب ماتجهز الطير من دعو وترتيب تشنذر الطير وبعدها تحاول تجيبله صيده مثل بط ولا فرخ رومي ولا نورس وتخليه يذبح ويحلل وبعدها تجيبله صيده بريه الا وهي الارنب هي اكثر مايخلي نفس الطير تطيح ويستهد الطير وكرر معه العمليه وبعد مايشرب الطير دم الصيد وياكل من لحمه تنزل وزن الطير وتخليه وزن هدد يعني مثلا لوطيرك حر 17 في مثلها وزنه فالربطه 1200 يكون وزن الهدد 980 تقريبا وبعضها 950 وبكذا تحس طيرك أستهد وصار فيه حراره

هذا والله أعلم ومن أجتهادي أن أصبت فمن ربي وأن أخطات فمن نفسي ومنكم نستفيد

أبيه مثل الداب فلقحف والعين & والعظم عظم عقاب ساق ومصايد

وسوابعه من كبرها قوس كفين & وأفجح وثنداته عليها زوايد

وأبغيه لاهديت مافيه ثنتين & يلحق وله فالصيد سبق وعوايد

via منتديات مكشات http://www.mekshat.com/vb/showthread.php?t=599156&goto=newpost